Hargeysa 18 July, 2012 (Saraar Media) Boqor Cismaan Aw Maxamuud Buurmadow , ayaa xalay laga sii daayay xabsiga Mandheera ee gobolka Saaxil, ka dib markii ay maxkamada gobolka Maroodi-jeex ku riday xukun dhan hal sanno, ayaa diiday in uu ka hadlo sababtii ay xukuumadu xadhiga muranka abuuray ula beegsatay.
Boqorka oo qaar ka mida warbaahinta kula hadlay, gurigiisa Magaalada Hargeysa, ayaa sheegay in in aanu wakhtigan diyaar u ahayn in uu ka hadlo xidhigiisii oo qaatay muddo afar bilood ah, isaga oo ku cudur daartay in uu wada tashi la yeelan doono saaxiibadii iyo shacabka reer Somaliland.
“ Adeer wax xumaan ah ma doonayo in aan ka hadlo oo ummada xumeeya , diyaar uma ahi, waxa weeye oday ayaan ahay odaygana waxa weeye marxalad kastaa waa ay soo martaa , ma doonayo in aan maanta ka hadlo , arrimahaas waa arrimo iska basiid ah si wanaagsan ayaanay wax walba ahaayeen wax dhibaato ahna lamaan kulmin , caafimaadkaygu wuu fiican yahay aad iyo aad baad u mahadsan tihiin mana doonayo in aan wax faahfaahin ah bixiyo “ ayuu yidhi Boqor Buurmadow.
Laakiin waxa uu mahadceliyay dadkii ka xumaaday xadhigiisii oo ay ka mid ahaayeen hay’adda caalamiga ah ee u dooda xuquuqda aadamaha oo xukuumada ugu baaqay in la sii daayo.
“ Waxa aan u mahadcelinayaa dadkii arrinkayga ka dadaalay iyo dadkii dhiidhiyay heer caalami ha noqoto ama hay’ado badan oo caalamiya ah , ayaa ka hadlay arrinkayga oo aad iyo aad uga hadlay ha ahaato Somaliland gudaheeda ama shacabka reer Somaliland qurba jooga Somaliland Sallaadiinta , madax dhaqameedka ganacsatada , qof kasta oo arrinkayga ka damqanayay aad iyo aad baan ugu mahadcelinayaa”.
Boqor Cismaan Aw Maxamuud Buurmadow, ayaa la sheegay in lagu sii daayay cafis uu u fidiyay Madaxweyne Siilaanyo, ka dib markii toddobaadkii kulamo isdaba jooga ahaa xarunta Madaxtooyada ku yeesheen madax dhaqameedka beelaha Habarjeclo uu Madaxweyne ku qanciyay sii dayntiisa.
Comments